“AZADLIQ” BLOKU İLHAM ƏLİYEVİ İSTEFAYA ÇAĞIRDI (Maraqlı)

«Ölkədəki korrupsiya piramidasının başında prezident dayanır»“Azadlıq” bloku “The Washington Post” qəzetinin Azərbaycan hakimiyyətini ifşa edən məqaləsi ilə bağlı bəyanat qəbul edib. Sənəddə deyilir:“The Washington Post” qəzetində Birləşmiş Ərəb Əmirliklərinin Dubay şəhərində Azərbaycanın dövlət başçısı Ilham Əliyevin övladlarının adına 75 milyon dollarlıq malikanələrin alınması ilə bağlı məqalə dərc olunub. Bu məqalə beynəlxalq səviyyədə böyük rezonans doğurub, dünyanın nüfuzlu nəşrləri bu məsələyə xüsusi diqqət yetiriblər. Lakin məqalənin dərcindən xeyli müddət keçməsinə, həmçinin yazıda yer alan məlumatların ölkə daxilində və beynəlxalq səviyyədə böyük rezonans doğurmasına baxmayaraq, bu günə qədər nə Ilham Əliyev, nə də hakimiyyət orqanları məsələyə rəsmi münasibət bildirib.“The Washington Post” kimi beynəlxalq səviyyədə çox nüfuzlu qəzet sayılan bir nəşrdə dövlət başçısı ilə bağlı belə bir məqalənin dərci haqlı olaraq Azərbaycan cəmiyyətində də çox böyük marağa səbəb olub. Cəmiyyət şəxsən Ilham Əliyevdən qəzetdə onun övladlarının adına Dubayda 75 milyon dollarlıq mülklərin alınmasıyla bağlı fakta münasibət bildirməsini gözləməkdədir. Lakin Ilham Əliyevin indiyədək susması onun cəmiyyətə bu barədə izahat vermək istəmədiyini və məqalədə yer almış faktları təkzib edə bilmədiyini göstərir.“Azadlıq” bloku bildirir ki, bu məqalədə yer almış faktlar Azərbaycan dövlətinin imicinə beynəlxalq səviyyədə çox böyük zərbə vurur. Eyni zamanda həmin faktlar Ilham Əliyevin ölkədəki korrupsiya piramidasının başında durduğunu təsdiq edir. Ilham Əliyevin məsələyə münasibət bildirməməsi və faktla bağlı beynəlxalq məhkəməyə müraciət etməməsi da sübut edir ki, “The Washington Post”da yazılanlar həqiqətdir və ölkənin sərvətləri Əliyevlər ailəsi tərfindən talan edilərək mənimsənilməkdədir. Bu fakt həmçinin Azərbaycanda korrupsiyanın ayrı-ayrı dövlət məmurlarının özfəaliyyəti olmadığını, Ilham Əliyevin başçılığı ilə dövlət siyasətinə çevrildiyini göstərir.“Azadlıq” bloku bəyan edir ki, məqalədə göstərilən faktlar həqiqəti əks etdirmirsə, o zaman Ilham Əliyev bu məsələdə həqiqətin üzə çıxarılması üçün beynəlxalq məhkəməyə müraciət etməlidir. Eyni zamanda blok bildirir ki, “The Washington Post”dakı məqalə ilə bağlı Ilham Əliyevin bu günədək xalqa heç bir məlumat və izahat verməməsi, beynəlxalq məhkəməyə müraciət etməməsi onun haqqında yazılan faktlarla razılaşdığını göstərir. Bütün bunları əsas götürərək, “Azadlıq” bloku Ilham Əliyevin Azərbaycan Respublikasının Prezidenti vəzifəsindən istefa verməsini tələb edir”.

Saytdakı materiallardan istifadə zamanı sayta istinad etməyiniz vacib deyil!
"Vəhdət" vəhdətçilərin saytı
vehdet.blogspot.com